Wet kwaliteitsboarging (Wkb)

Stap 1. Ynhiere kwaliteitsboarger:

Jo hiere sels in kwaliteitsboager yn. Op de webside Toelatingsorganisatie Kwaliteitsborging Bouw fine jo in list mei kwaliteitsboargers.

Stap 2. Boumelding yntsjinje:

Jo meie net begjinne mei bouwen, foardat jo in komplete melding yntsjinne hawwe. Minimaal fjouwer wike foardat de bou begjint, tsjinje jo de boumelding yn fia it Omjouwingsloket. Dêr jouwe jo ek oan wa't jo kwaliteitsboarger is.

Leverje alle ynformaasje oan dêr't om frege wurdt. Jo krije fan de gemeente te hearren oft jo melding akseptearre of ôfwiisd is. Untbrekt der ynformaasje? Dan moatte jo in nije melding yntsjinje. Fjouwer wike nei it yntsjinjen fan de melding meie jo mei de bou begjinne.

Stap 3. Start bou:

Twa dagen foar it begjin fan de bou jouwe jo dat troch fia it Omjouwingsloket..

Stap 4. Kontrôle troch kwaliteitsboarger:

De kwaliteitsboarger kontrolearret oft oan de boutechnyske foarskriften foldien wurdt. De gemeente bliuwt it befoege gesach. As der in reden foar is, kontrolearret de gemeente oft der oan de boufoarskriften foldien wurdt. Ek as der gjin boumelding of reemelding yntsjinne is, kin de gemeente hanthavenje. De kwaliteitsboarger kin dat net.

Jo krije in ferklearring fan de kwaliteitsboarger as it fertrouwen bestiet dat it bouwurk oan de boutechnyske foarskriften foldocht.

Stap 5. Ein fan de bou:

Ien dei nei it ophâlden fan de bou jouwe jo dat troch fia it Omjouwingsloket.

Stap 6. Reemelding:

Jo meie it bouwurk net brûke foardat jo in folsleine reemelding yntsjinne hawwe. Minimaal twa wike foardat jo it bouwurk yn gebrûk nimme wolle, tsjinje jo in reemelding yn fia it Omjouwingsloket.

Jo krije fan de gemeente te hearren oft jo melding akseptearre of ôfwiisd is.

Yntsjinje boumelding

De boumelding moat de neikommende gegevens befetsje (artikel 2.18 Beslút bouwurken leefomjouwing):

• Namme, adres en telefoannûmer fan dyjinge dy't it bouwurk bout;
• Namme, adres en telefoannûmer fan in folmachtige (as dy de melding yntsjinnet);
• E-mailadres (as melding elektroanysk dien wurdt) fan dyjinge dy't it bouwurk bout of fan de folmachtige;
• Deitekening;
• Adres, kadastrale oantsjutting of koördinaten fan de lokaasje dêr't de aktiviteit plakhat;
• In beskriuwing fan de bouaktiviteit, ynklusyf de gebrûksfunksje fan it bouwurk;
• Wa't de kwaliteitsboarger is en mei hokker ynstrumint foar kwaliteitsboarging de kwaliteitsboarger wurket;
• Risikobeoardieling;
• Boargingsplan. It boargingsplan leverje jo yn by de boumelding. It boargingsplan beskriuwt yn alle gefallen (artikel 3.80):
  • it ta stân kommen derfan;
  • de aard en omfang fan de út te fieren kwaliteitsboarging;
  • de foar de kwaliteitsboarging einferantwurdlike persoanen;
  • hoe't de ûnderskate ûnderdielen fan it bouplan yn gearhing beoardiele wurde;
  • hoe't yntegraal beoardiele wurdt oft de bouwurksumheden foldogge oan de boufoarskriften (bedoeld yn de haadstikken 4 en 5 fan it Beslút bouwurken leefomjouwing);
  • yn hokker gefallen en op hokker mominten it boargingsplan aktualisearre wurdt;
  • hokker noarmen of kwaliteitsferklearringen bou (artikel 2.14, lid 2 en 3) of lykweardige maatregels (artikel 2.4) by de bouwurksumheden tapast wurde;
  • op hokker bouwurksumheden de beoardieling op syn minst rjochte is en by hokker bouwurksumheden rekken hâlden wurdt mei oare kwaliteitsboargingssystemen.

Yntsjinje reemelding

Nei it opleverjen fan it bouwurk moat in reemelding yntsjinne wurde by it befoege gesach. De reemelding bestiet út: 

• Namme, adres en telefoannûmer fan dyjinge dy't de boumelding dien hat;
• Adres, kadastrale oantsjutting of koördinaten fan de lokaasje dêr't de bouaktiviteit útfierd is;
• Deitekening;
• It 'dossier befoege gesach' dat bestiet út:
  • de ferklearring fan de kwaliteitsboarger;
  • ynformaasje (as dy fan belang is) dy't yngiet op de troffen maatregels yn it boargingsplan om boutechnyske risiko's foar te kommen of te beheinen;
  • oantsjutting fan de gebrûksfunksjes, ferbliuwsgebieten, ferbliuwsromten en de ôfmjittingen en de besetting fan alle romten, ynklusyf totaaloerflakten foar elke gebrûksfunksje;
  • Ynformaasje dêr't út bliken docht dat it bouwurk foldocht oan de regels oer:
    • boukonstruksje;
    • luchtferfarsking;
    • enerzjysunigens;
    • miljeuprestaasje;
  • ynformaasje oer brânfeiligens (deselde ynformaasje as dy't nedich is by in melding brânfeilich gebrûk yn artikel 6.8, lid 1, ûnder d, ûnder 4° en 5°  Beslút bouwurken leefomjouwing);
  • ynformaasje oer tapaste lykweardige maatregels (artikel 4.7 fan de Omjouwingswet).