Fundearringsskea melde
Wenje jo yn it Fryske feangreidegebiet? En hawwe jo it fermoeden dat jo fundearringsskea hawwe? Doch dan in melding by it Funderingsloket Fryslân
Fundearringsloket
By it fundearringsloket kinne jo terjochte:
- as jo tinke dat jo wenning fundearringsskea hat;
- mei fragen oer ûndersyk of oanpak fan fundearringsskea.
By it Funderingsloket Fryslân kinne jo melding meitsje fan mooglike fundearringsskea oan pannen yn it Fryske feangreidegebiet. In fundearringssaakkundige fan it Kennis Centrum Aanpak Funderingsproblematiek (KCAF) sil jo melding op ôfstân besjen en jout jo dêrnei in reaksje.
Subsydzjeregeling fundearringsûndersyk
Fan tiisdei 9 jannewaris 2024 ôf wurdt de subsydzjeregeling fundearringsûndersyk iepensteld. Dy subsydzje is beskikber foar ynwenners yn it Fryske feangreidegebiet.
Foar wa?
De regeling is beskikber foar eigener-bewenners fan wenningen en VvE's mei wenningen boud foar 1970 yn it feangreidegebiet. Binne jo der net wis fan oft jo hûs yn it feangreidegebiet stiet? Meitsje dan gebrûk fan de postkoadetsjekker. Op de webside fan it Kadaster kinne jo besjen oft jo wenning foar 1970 boud is.
Hoefolle subsydzje kinne jo krije?
De subsydzje fergoedet 80% fan de makke ûndersykskosten, oant in maksimum fan € 4.000 de wenning. Meitsje jo ek gebrûk fan in frijskattingsregeling fan gemeente of wetterskip? Dan kinne jo 100% fan de fundearringsûndesykskosten fergoede krije oant in maksimum fan € 7.500.
Subsydzje oanfreegje
Om de subsydzje oanfreegje te kinnen, hawwe jo in ûndertekene offerte nedich fan in erkend ûndersyksburo. Op de webside fan it KCAF is de list fan erkende bedriuwen te finen. Yn de subsydzjeregeling sels stiet hokker dokuminten noch mear oanlevere wurde moatte.
Oanfreegje kin fan tiisdei 9 jannewaris 2024 ôf fia veenweidefriesland.frl.
Achtergrûnynformaasje
Yn it feangreidegebiet binne der wenningen dy't mei (begjinnende) fundearringsproblemen te krijen hawwe. Troch boaiemdelgong en lege grûnwetterstannen kinne fundearringspeallen foar in part net mear ûnder wetter stean. Oant 1970 waarden wenningen benammen op houten peallen boud. As dy net mear ûnder wetter stean, kin der pealrot ûntstean. Dêrtroch kin de fundearring fersakje. Faak is dat te fernimmen oan bygelyks skuorren yn muorren, fersakke bûtenmuorren of ruten en doarren dy't lestich slute. Om fundearringsproblemen fêst te stellen is it oan te rieden om fundearringsûndersyk útfiere te litten.
Fragen?
- Foar fragen oer de subsydzjeregeling kinne jo kontakt opnimme mei it Klantekontaktsintrum fan provinsje Fryslân: 058 292 59 25 of provincie@fryslan.frl.
- Foar fragen oer fûndearringsûndersyk kinne jo terjochte by it fundearringsloket fan it KCAF: 085 30 36 286 of veenweidefryslan@kcaf.nl.
