Berte oanjaan
Oanjefte fan de berte dogge jo binnen 3 dagen nei de bertedei. De bertedei telt net mei. As de lêste dei fan dy 3 dagen op in sneon, snein of in yn Nederlân erkende feestdei falt, einiget de termyn op de earstfolgjende wurkdei.
Wa kin de berte-oanjefte dwaan?
De heit of duomem fan it bern is ferplichte om berte-oanjefte te dwaan. De mem út wa't it bern berne is, mei ek oanjefte dwaan, mar dat is net ferplichte. It bern hoecht net mei nei de berte-oanjefte.
Kinne de heit, duomem of mem gjin oanjefte dwaan? Dan kin de oanjefte dien wurde troch:
- ien dy't by de berte oanwêzich wie;
- de eigener fan de wenning dêr't it bern yn berne is; of
- in meiwurker fan de ynstelling dêr't it bern berne is, bygelyks it sikehûs.
Docht net ien fan dy persoanen oanjefte? Dan wurdt de berte-oanjefte dien troch of út namme fan de boargemaster fan de gemeente dêr't it bern berne is.
Berte digitaal trochjaan
Jo kinne de berte (digitaal) trochjaan as:
- jo bern yn de gemeente Smellingerlân berne is.
- jo de mem fan it bern binne.
- jo offisjeel, fia houlik, registrearre partnerskip of troch erkenning, de heit of de duomem fan it bern binne.
Wat hawwe jo nedich?
- DigiD;
- kopy of foto/scan fan de erkenningsakte of de akte fan nammekar (as dat fan tapassing is);
- ferklearring fan it sikehûs of fan de ferloskundige.
Digitaal berte-oanjefte dwaan (mei DigiD)
Oanjefte dwaan op it gemeentehûs
Kinne jo net digitaal oanjefte dwaan? Meitsje dan in ôfspraak om del te kommen op it gemeentehûs.
Meinimme nei de ôfspraak
- In jildich paspoart, identiteitskaart of rydbewiis.
- Eventueel trouboekje of partnerskipsboekje.
- Eventuele kopy fan de erkenningsakte fan jo bern.
- Eventuele kopy fan de akte fan nammekar.
- Yn gefal fan âlderskip fan itselde geslacht nimme jo ek de donorferklearring mei.
Achternamme bern
De wet bepaalt hokker achternamme in bern kriget. Yn guon gefallen kinne âlden of fersoargers kieze hokker achternamme harren bern kriget. Mear ynformaasje fine jo op de webside fan de Ryksoerheid.
Boargerservicenûmer (BSN)
Binnen likernôch in wike nei de berte-oanjefte stjoert de wengemeente de brief mei it BSN nei it adres dêr't it bern ynskreaun stiet yn de Basisregistraasje Persoanen (BRP).
Bernetaslach
Bernetaslach giet automatysk. Krije jo al bernetaslach? Dan wurdt de hichte fan de bernetaslach automatysk oanpast.