Meast stelde fragen oer de WOZ

Wat is de WOZ-wearde?

De WOZ-wearde is in sa goed mooglike skatting fan de ferkeappriis fan jo wenning as dy op de weardepeildatum ferkocht wêze soe. De weardepeildatum leit altyd op 1 jannewaris fan it jier dêrfoar.

Hoe komt de WOZ-wearde ta stân?

De WOZ-wearde is it skatte bedrach fan in wenning wannear't dy op de weardepeildatum ferkocht wêze soe. Is der gjin wenning kocht of ferkocht, dan wurdt de wenning fergelike mei fergelykbere wenningen. Dy fergeliking wurdt makke op basis fan merkgegevens lykas ferkeapprizen fan fergelykbere wenningen en op basis fan objektkenmerken:

  • Boujier
  • Type wenning (bygelyks frijsteand, rychjewenning, appartemint)
  • Tal fjouwerkante meters fan it wenoerflak
  • Grutte fan it perseel
  • Steat fan de wenning
  • Bygebouwen (bygelyks skuorre, carport, oerkaping)

De wenningen hoege net itselde te wêzen om mei-inoar fergelike te wurden. Wenningen wurde fergelike op basis fan boppesteande kenmerken.

Wêr kin ik de WOZ-wearde fan myn wenning en dy fan oare wenningen ynsjen?

De WOZ-wearden fan wenningen binne iepenbier. Jo kinne jo WOZ-wearde fergelykje mei dy fan oare wenningen fia it WOZ-weardeloket.

Neist de WOZ-wearde toant it loket ek gegevens út de Basisregistraasje Adressen en Gebouwen (BAG). Bygelyks it boujier, wenfunksje en de oerflakte. Klopje de gegevens yn de BAG neffens jo net? Meld dat dan fia de knop 'fout melden' op de webside fan it Kadaster.

Wêr kin ik it taksaasjeferslach fan myn wenning fine?

Op de webside kinne jo it taksaasjeferslach fan jo wenning rieplachtsje fia de Digitale Belestingbaly.

Tink derom: Allinnich dyjinge dy't de beskikking op namme krigen hat, kin it taksaasjeferslach ynsjen.

Wat stiet der op it taksaasjeferslach?

It taksaasjeferslach lit sjen hoe't de wearde fan jo wenning ta stân kommen is. It taksaasjeferslach jout in oersjoch mei hokker kenmerken en objektûnderdielen rekken hâlden is by de wurdearring. Bygelyks boujier fan de wenning, type wenning, grutte fan de wenning, grûnoerflak, steat fan de wenning en de bygebouwen.

Yn it taksaasjeferslach steane ek trije fergelykbere wenningen dy't om de weardepeildatum hinne ferkocht binne. De ferkochte wenningen hoege net itselde te wêzen as jo wenning. Nei alle gedachten sille se op ûnderdielen ferskille. Mei dy ferskillen wurdt rekken hâlden yn de wurdearring.

Wat bart der mei it fêststellen fan de WOZ-wearde by in nijbouwenning of in ferbouwing?

Is jo wenning yn 2024 feroare troch bygelyks in ferbouwing? Of bouwe jo in nij hûs? Dan hat dat effekt op de WOZ-wearde. De taksateur sjocht dan nei de situaasje fan it pân op 1 jannewaris 2025. Is de ferbouwing dan klear, dan wurdt dat ek meinaam yn jo WOZ-wearde. By nijbou wurdt sjoen hoe fier't jo binne mei de wenning op 1 jannewaris 2025. As de wenning noch net klear is, dan wurdt dêr rekken mei hâlden yn de wurdearring. Jo wenning wurdt wol taksearre nei de weardepeildatum fan 1 jannewaris 2024.

Ik haw ferline jier beswier makke, mar no is de WOZ-wearde wer te heech, hoe kin dat?

Alle jierren wurdt opnij de WOZ-wearde fêststeld mei de ferkeapsifers fan fergelykbere wenningen. Sadwaande wurde de ûntwikkelingen op de wenningmerk folge. Hawwe jo ferline jier beswier makke tsjin jo WOZ-wearde, dan betsjut dat net dat de WOZ-wearde fan dit jier gelyk bleaun is.

Wêrom hat de wenning fan myn buorlju in legere WOZ-wearde?

Dat komt faak troch ferskillen yn objektkenmerken of ûnderdielen fan de beide wenningen. Jo kinne dêrby tinke oan dat jo in gruttere wenning hawwe, in grutter perseel, dakkapel, bettere steat fan de wenning of ferskil yn bygebouwen/garaazje.

Is it foar jo ûndúdlik en wolle jo dêroer yn petear mei in taksateur? Meitsje dan in ôfspraak foar it telefoanysk WOZ-taksaasje-sprekoere.

Is in beswier yntsjinje fia no-cure-no-pay-partijen fergees?

Der binne bedriuwen dy't foar jo 'fergees' beswier meitsje kinne. Echt fergees is dat net. By in lytse oanpassing fan de WOZ-wearde krije dy buro's in fergoeding betelle mei mienskipsjild. Jo foardiel is dat jo in pear euro belestingjild weromkrije.

Fine jo dat de WOZ-wearde net kloppet, meitsje dan earst in ôfspraak foar it telefoanysk WOZ-taksaasje-sprekoere. Persoanlik kontakt is flugger en nofliker as it meitsjen fan in beswier. Jo fragen kinne fuortendaliks beäntwurde wurde troch de taksateur en is de WOZ-wearde net goed, dan passe wy it oan.

Wolle jo in petear oer jo WOZ-wearde?

Hawwe jo jo taksaasjeferslach besjoen, de WOZ-wearden op it WOZ-weardeloket en hawwe jo noch fragen dy't net beäntwurde binne? Nim dan kontakt op mei ús taksateur. Meitsje dan in ôfspraak foar it telefoanysk WOZ-taksaasje-sprekoere.

Wolle jo graach fia de telefoan in ôfspraak meitsje? Dan kinne jo ús belje op 0512 581 234.

Hoe kin ik sels beswier yntsjinje? 

Binne jo it nei it oerlis mei de taksateur noch net iens mei de WOZ-wearde of útlis? Dan kinne jo binnen 6 wike nei de datum fan de WOZ-beskikking fergees beswier meitsje.

Dat regelje jo sels ienfâldich op ús webside. Jo beswier wurdt ek flugger ôfhannele. Ferline jier hie 80% al in útspraak op it beswier fóár 1 july 2024. De proseduere fia in no-cure-no-pay-buro is komplekser en duorret langer. Fia ús online formulier op de webside wurde jo yn in pear stappen begelaat oant it yntsjinjen fan it beswierskrift.

By it yntsjinjen fan it beswier is it ek mooglik om bestannen ta te foegjen, om jo beswier te ferdúdlikjen. Lykas in resint taksaasjerapport of foto's fan de steat fan ûnderhâld of binnenkant fan jo wenning. Dat soarget foar in flotte ôfhanneling fan jo beswier.