Beswier gemeentlike belestingen en WOZ-wearde
Binne jo it net iens mei de oanslach gemeentlike belestingen? Nim dan earst kontakt mei ús op. Wy wolle krekt as jo dat it kloppet.
WOZ-wearde
Yn it taksaasjeferslach stiet hoe't de WOZ-wearde ta stân kommen is. By de wurdearring fan jo wenning fergeliket de taksateur jo wenning mei 3 fergelykbere wenningen dy't koartlyn ferkocht binne. Yn it taksaasjeferslach stiet ûnder oare ynformaasje oer: brûkersoerflakte fan de wenning, bygebouwen, WOZ-wearde, gegevens út it kadaster, lykas de grutte fan it perseel.
Skriuwe jo sels in beswierskrift? Set dan it oanslachnûmer derop dat op jo belestingoanslach stiet. Beskriuw dúdlik wêrom't jo beswier meitsje en ûndertekenje it formulier. Jo kinne gebrûk meitsje fan ús sjabloon, mar dat hoecht net. Jo kinne jo beswier e-maile nei gemeente@smallingerland.nl. Of stjoer it mei de post nei: Gemeente Smellingerlân, o.f. de heffingsamtner, Postbus 10.000, 9200 HA Drachten. Wolle jo foar mear as 2 adressen tagelyk beswier meitsje? Mail jo beswier dan nei gemeente@smallingerland.nl.
Sels beswier meitsje is fergees! No cure, no pay is net fergees
Der binne bedriuwen dy't beswier foar jo meitsje kinne. Dat is net nedich, want beswier meitsje is net dreech. Fia ús online formulier wurde jo yn in pear stappen begelaat oant in beswierskrift ta. Bûtendat liket beswier meitsje fia no cure no pay-bedriuwen fergees, mar yn werklikheid soargje se derfoar dat de tariven foar de gemeentlike belestingen heger wurde.
Animaasjefideo oer beswier meitsjen
Net automatysk útstel fan beteljen
Beswier yntsjinje betsjut net automatysk útstel fan beteljen. Jo moatte de belesting noch hieltyd op tiid betelje . As jo online beswier meitsje, kinne jo wol fuortendaliks útstel fan beteljen oanfreegje, troch dat oan te jaan op it formulier. As jo sels in beswierskrift opstelle, moatte jo dêryn oanjaan oft jo útstel fan beteljen wolle.
Nei jo beswier
Jo krije sa gau mooglik in reaksje op jo beswierskrift. Omdat elkenien yn de gemeente tagelyk de belestingoanslach krijt, krije wy alle beswierskriften ek yn deselde perioade binnen. Dêrom hawwe wy wetlik sjoen oant 31 desimber fan itselde belestingjier om jo beswier te behanneljen. Fansels besykje wy jo beswier sa gau mooglik te behanneljen.
Werombetelling by tawizing beswier
Hawwe jo gelyk krigen? Dan stoarte wy it bedrach dat jo tefolle betelle hawwe werom nei jo rekken.
